Mataimakin Ministan Harkokin Wajen Rasha, Mikhail Bogdanov, ya bayyana cewa Rasha ta kafa hulɗa kai tsaye da ƙungiyar Hay’at Tahrir al-Sham (HTS) domin tabbatar da ci gaba da kasancewar sansanonin sojojinta a Siriya, duk da faduwar gwamnatin ƙasar.
Bogdanov ya jaddada muhimmancin wadannan sansanonin a yaki da ta’addanci. Ya bayyana cewa hulɗar su da HTS tana tafiya cikin kyakkyawar hanya, yana fatan cewa ƙungiyar za ta tabbatar da doka, tsaro ga diplomasiyya da sauran ƙasashen waje, da kuma hana wasu abubuwan da za su iya kawo cikas.
Rasha tana da sansanonin sojoji guda biyu masu muhimmanci a Siriya: sansanin ruwa na Tartus da sansanin sama na Hmeimim, wanda ke kusa da Latakia. Wadannan sansanonin an kafa su ne domin yaki da 'yan ta'adda kamar Daesh.
Gwamnatin Rasha tana ƙara jaddada cewa yaki da ta’addanci ba a kammala ba, kuma yana buƙatar haɗin gwiwa daga kowane ɓangare. Duk da cewa yanayin a kasa yana canzawa, Bogdanov ya tabbatar da cewa sojojin Rasha zasu cigaba da kasancewa a Siriya don tallafawa yaki da ta’addanci.
A ƙarshen watan Nuwamba, mayakan sun kai hare-hare a Aleppo da Idlib, sannan suka ci gaba zuwa Damascus, inda suka sauke gwamnatin Shugaba Bashar al-Assad a farkon watan Disamba.