Birgediya Janar Yahya Saree, kakakin rundunar sojin Yaman, ya sanar a wata hira ta talabijin a ranar Asabar cewa, sojojin sun kai harin ramuwar gayya a Tel Aviv ta amfani da makami mai linzami na Zulfiqar.
Makamin Zulfiqar, wanda aka ce yana iya kauce wa radar kuma yana da juriya sosai, yana da nisan zangon fiye da kilomita 2,000 (mil 1,242).
Saree ya ce makamin ya kai ga burinsa da cikakken daidaito, kuma na’urorin tsaron sararin samaniyar Isra’ila sun kasa tare shi.
Ya kara da cewa, Sojojin Yaman za su cigaba da mara wa gwagwarmayar Falasdinawa baya, ba tare da jinkiri ba, duk lokacin da aka karya yarjejeniyar tsagaita wuta, wadda za ta fara aiki ranar Lahadi da misalin karfe 8:30 na safe (0630 GMT).
Tun da safiyar yau, Filin jirgin saman Ben Gurion na Tel Aviv ya dakatar da zirga-zirgar jiragen sama sakamakon harin makamin Yaman.
Rahotanni sun nuna tarkace da harsasan makamin sun fado a Quds, wasu sun fado kusa da gidan mai a Moshav Mevo Beitar, yayin da wani kaso ya fada filin da ke kusa da Beitar Ilit, wani yanki da ba bisa ka’ida ba.
A ranar 14 ga Janairu, sojojin Yaman sun kai hari kan ginin ma’aikatar yakin Isra’ila da makamin Palestine-2.
Tun bayan da Isra’ila ta fara yakinta kan Gaza a ranar 7 ga Oktoba, 2023, Yaman na kai hare-hare kan Isra’ila da Amurka don nuna goyon baya ga Falasdinawa. Haka kuma, suna kai hare-hare kan jiragen ruwa da ke da alaka da Isra’ila, Amurka, ko Burtaniya domin kawo karshen yakin Isra’ila.
Harin ya sa an rufe tashar jiragen ruwa ta Eilat, lamarin da ya janyo koma baya ga tattalin arzikin Isra’ila.
Sojojin Yaman sun ce ba za su daina kai hare-hare ba har sai Isra’ila ta kawo karshen hare-harenta a Gaza, inda aka kashe Falasdinawa 46,899, galibi mata da yara, tare da jikkata 110,725. Wasu dubbai kuma sun bace kuma ana zaton sun mutu a karkashin baraguzan gine-gine.