Mataimakin babban sakataren kungiyar Hizbullah Sheikh Naim Qassem ya jaddada cewa tsagaita bude wuta a zirin Gaza ita ce mafita daya tilo wajen samun zaman lafiya a kan iyakar Lebanon da Isra'ila. A wata hira da ya yi da Kamfanin Dillancin Labarai na Associated Press, Sheikh Qassem ya jaddada cewa, nan take kungiyar Hizbullah za ta dakatar da yaƙi idan aka aiwatar da yarjejeniyar tsagaita bude wuta a Gaza.
Sheikh Qassem ya kuma yi tsokaci kan barazanar da Isra'ila ke yi a baya-bayan nan kan Labanon, inda ya bayyana cewa gwamnatin sahyoniyawan ta kasa yanke shawara kan yaki da kungiyar Hizbullah. Ya gargadi Isra'ila da cewa duk wani matakin soji da za a dauka a Lebanon ba za a iya dakile shi ba, kuma za ta fuskanci turjiya mai karfi daga kungiyar Hizbullah.
Tun lokacin da Isra'ila ta fara yaƙin kisan kare dangi a Gaza, kungiyar Hizbullah ta kaddamar da wani gagarumin farmaki kan yankunan arewacin Isra'ila, inda suke amfani da sahihan makamai na zamani. Hakan dai ya haifar da cikas da fargaba a tsakanin mazauna Isra'ila, inda da dama suka tsere daga yankin. Kafafen yada labaran yahudawan sahyoniya sun kira matakin da kungiyar Hizbullah ta dauka a matsayin "yaƙin ɗauki ɗai-ɗai".
Bayanin na Sheikh Qassem dai ya jaddada aniyar Hizbullah gurin kare kasar Labanon da kuma goyon bayan gwagwarmayar Palasdinawa a Gaza. An bukaci kasashen duniya da su yi kokarin ganin an tsagaita bude wuta a zirin Gaza, wanda zai share fagen samar da zaman lafiya a kan iyakar Lebanon da Isra'ila.