Kafar yada labaran Amurka MSNBC ta bayar da rahoton cewa, duk wani yaƙin da Isra'ila za ta yi da kungiyar Hizbullah ta kasar Labanon, to gwamnatin Tel Aviv tasan cewa bawai kawai zata gamu da abokiyar gaba mai zaman kanta kuma mafi ƙarfi a Gabas ta Tsakiya ba, itace wadda ta fi tasiri fiye da dakaru masu yawa a yankin.
Kungiyar Hizbullah a shekarar 2024 ta fi girma, ta fi karfin makamai, ta fi kwarewa, ta kuma fi karfin siyasa fiye da yadda ta kasance a shekarar 2006, kamar yadda IRNA ta ruwaito daga rahoton MSNBC a ranar Alhamis.
Rahoton ya nuna cewa kamata ya yi Amurka ta yi magana da jami'an Isra'ila, a fili da kuma a boye, cewa ba ta goyon bayan yakin da ake yi a kasar Lebanon, kuma ba za ta kai dauki ga gwamnatin kasar ba idan ta zabi ta kunna wuta.
An ba da rahoton cewa, tabbas jami'an Amurka sun fahimci cewa a duk wani yaki da za a iya yi tsakanin gwamnatin Sahayoniya da Hizbullah, akwai yiyuwar cewa "Amurka ba za su tsira daga abin da zai biyo baya ba."
Bugu da kari, MSNBC ta kara da cewa idan yaƙi ya ɓarke, makamai masu linzami na Dakarun Musulunci na iya kaiwa kowane wuri a Isra'ila, musamman muhimman kayayyakin more rayuwa na farar hula, filayen jiragen sama, tashoshin jiragen ruwa, hanyoyin sadarwa na lantarki, da tashoshin wutar lantarki.
Rahoton ya kuma yi nuni da cewa sojojin ƙasa na Isra'ila za su fuskanci mayakan Hizbullah da suka samu dabarun soji bayan shafe shekaru suna zamansu a Siriya.
A halin yanzu ana kiyasin karfin soji na kungiyar Hizbullah ya hada da manyan makaman roka da makamai masu linzami sama da 200,000, masu tazara iri-iri.
Har ila yau al'amura a yankunan da aka mamaye na arewa za su kara tabarbarewa, inda tattalin arzikin gwamnatin haramtacciyar kasar Isra'ila ke kara tabarbarewa yayin da mazauna yankunan ke barin matsugunansu domin tsira.