Kungiyar Gwagwarmayar Musulunci ta Hezbollah, ta bayyana cewa ta kai hari ga sansanin soja na 7200 na gwamnatin Isra’ila da ke kudancin Haifa ta amfani da makamai masu linzami.
A cikin wata sanarwa da ta fitar a ranar Litinin, Hezbollah ta ce kungiyar ta kuma kai hari ga taron sojojin Isra’ila a sansanin Hunin da makamai masu linzami.
Hezbollah ta gudanar da hari mai karfi kan sansanin sojojin Isra’ila a Kfar Kila da ke kudancin Lebanon, kamar yadda jaridar yakin kungiyar ta sanar.
A wata sanarwar ta daban, Hezbollah ta bayyana cewa ta kai hari kan sojojin Isra’ila da ke zaune a ƙauyen al-Manara a karo na biyar.
Har wala yau kuma, Hezbollah ta fitar da sanarwa har guda 38 domin sanar da hare-haren da ta kai kan taron sojojin Isra’ila da kuma sansanonin sojin na Sahyoniya a arewacin Palestine da aka mamaye.
Bayan hare-harenta, Hezbollah ta bayyana cewa ta kai hari kan kudancin Haifa da jiragen kamikaze, inda ta kashe sojoji hudu na Isra’ila.
Gwamnatin Sahyoniya ta tabbatar da faruwar wannan lamari, yayin da rahotanni suka nuna cewa wasu daga cikin wadanda suka jikkata na cikin mawuyacin hali, don haka adadin wadanda suka mutu na iya karuwa.
Tun daga farkon Yakin kisan kare dangi a Gaza a watan Oktoba, 2023, kungiyoyin gwagwarmaya a Iraki, Lebanon, Palestine, Yemen, da Syria sun gudanar da hare-hare daban-daban kan Isra’ila domin goyon bayan mutanen Palestine da ke cikin mawuyacin hali a Gaza da kuma al’ummar Lebanon.
A yau kuma, Hezbollah ta ce a cikin wata sanarwa cewa kungiyar ta kai hari kan taron sojojin Isra’ila a Khale Verde kusa da iyakar Lebanon da Palestine da aka mamaye tare da makami mai linzami a karo na farko.
Wannan hari ya kasance na biyu a irin wannan nau’in da Hezbollah ta kai ga sansanonin Isra’ila a cikin awanni kaɗan da suka gabata.
Hezbollah ta bayyana cewa ta fara sabbin hare-hare kan sansanonin Isra’ila tare da kai hari ga Labbouneh inda wasu sojojin gwamnatin Sahyoniya suka taru.