An kashe wasu manyan alkalai biyu na Iran a wani harin ta'addanci da aka kai a ginin Kotun Koli da ke tsakiyar birnin Tehran.
Wata sanarwa da Ma’aikatar Shari’a ta fitar ta bayyana sunayen alkalai biyu da aka kashe su ne Ali Razini, shugaban reshe na 39 na Kotun Koli, da Mohammad Moqiseh, shugaban reshe na 53.
"Wani mutum dauke da bindiga ya shiga dakin alƙalan biyu kafin azahar ranar Asabar ya kashe su," in ji mai magana da yawun hukumar shari'a, Asghar Jahangir. Ya kuma kara da cewa mai tsaron lafiyar alkalan ya samu rauni a harin.
"Dan bindigar ya kashe kansa nan take yayin da yake kokarin tserewa, don haka a halin yanzu ba za mu iya yin magana kan dalilansa ba," in ji Jahangir.
Alkalan sun kasance suna kula da shari'o'in da suka shafi tsaron kasa, leken asiri, da kuma ta'addanci.
"Shahidan biyu Razini da Moqiseh sun kasance cikin shirin makiya saboda kyakkyawan tarihin aikinsu," in ji Jahangir.
"A cikin shekarar da ta gabata, Ma’aikatar Shari’a ta dauki matakai masu yawa don gano 'yan leken asiri da kungiyoyin da ake kira munafukai, wanda hakan ya haifar da fushin makiya," ya kara da cewa.
Kungiyar Mujahedin Khalq (MKO), wadda ke da dogon tarihin kashe-kashe da ta'addanci, ana kiran ta munafukai a Iran.
"Muna fatan samun nasarar bayyana sakamakon bincikenmu don kamo wadanda ke da hannu a wannan harin," Jahangir ya ce.
A cewar binciken farko, maharin bai taba kasancewa cikin wata shari'a da ke gaban Kotun Koli ba.
A cikin shekarar da ta gabata, Ma’aikatar Shari’a ta Iran ta ci gaba da daukar matakan gano da hukunta wakilai da sauran abubuwan da ke da alaka da Isra'ila, Amurka, da kungiyoyin ta'addanci.
Razini, mai shekaru 71, ya rike mukamai da dama a bangaren shari'a na Iran, kuma a shekarar 1998 an yi kokarin kashe shi ta hanyar dasa bam mai maganadisu a motarsa.
Allah Ta'ala ya Karɓi Shahadarsu