Wani ministan Isra’ila tare da dukkan jam’iyyarsa sun yi murabus daga haɗin gwiwar gwamnatin Firayim Minista Benjamin Netanyahu saboda yarjejeniyar tsagaita wuta a Gaza.
Itamar Ben-Gvir da jam’iyyarsa ta “Jewish Power” sun bayyana a ranar Lahadi cewa suna barin haɗin gwiwar saboda “amincewa da yarjejeniyar rashin hankali da Hamas.”
Jam’iyyar ta kira yarjejeniyar tsagaita wutar a matsayin “miƙa wuya ga Hamas” da kuma watsi da abin da Isra’ila ta kira nasarorin gwamnatin Netanyahu tun farkon yaƙin.
Ko da yake Jewish Power ta ce ba za ta nemi kifar da gwamnatin Netanyahu ba, ficewar ministocinta, musamman Ben-Gvir, ta raunana haɗin gwiwar Netanyahu sosai.
Jam’iyyar ta bayyana cewa za ta iya dawowa cikin haɗin gwiwar idan yaƙin ya sake ɓarkewa.
A cikin wani bidiyo da ya wallafa a X, Ben-Gvir ya amince da cewa shi da Bezalel Smotrich, wani minista na Isra’ila, sun yi amfani da tasirin siyasar su don hana ci gaba da aiwatar da yarjejeniyar tsagaita wuta.
“Idan aka amince da wannan yarjejeniya marar hankali kuma aka aiwatar da ita, jam’iyyar Jewish Power ba za ta ci gaba da zama cikin gwamnati ba, kuma za ta fice,” in ji shi.
Ben-Gvir ya kuma bayyana cewa dole ne a “dakatar da shigar kayan agaji, man fetur, wutar lantarki, da ruwa gaba ɗaya” zuwa Zirin Gaza da ya yi fama da yaƙi.
An taɓa yanke masa hukunci kan tunzura wariya, lalata dukiya, mallakar kayan yaɗa labarai na ƙungiyar “ta’addanci,” da kuma goyon bayan wata ƙungiyar ta’addanci – ƙungiyar Isra’ila Kahane Chai, wadda ya shiga tun yana da shekara 16.
An tilastawa Isra’ila amincewa da yarjejeniyar tsagaita wuta da Hamas a ranar Laraba, wadda aka shirya ta fara aiki a ranar Lahadi 06:30 GMT.
Isra’ila ta fara kai farmaki mai tsanani a Gaza ranar 7 ga Oktoba, 2023, bayan da ƙungiyoyin gwagwarmayar Falasɗinu ƙarƙashin Hamas suka kai wani hari na tarihi a matsayin martani ga ƙara zaluntar al’ummar Falasɗinu.
Tun daga watan Oktoba, Isra’ila ta kashe aƙalla Falasɗinawa 46,788, yawancinsu mata da yara, tare da jikkata kusan 110,450 a Gaza.